الطاعون_يضرب_الصين_بعنف

#الطاعون_يضرب_الصين_بعنف

مبدئيا كده وقبل مساء الخير، #الصين أعلنت مستوى الخطر الثالث لتفشي مرض #الطاعون_الدبلي أو #الدملي فـ منطقة منغوليا الداخلية شمال البلاد

ده حصل بعد رصد مريض فـ بؤرة تفشي محتملة.. وامبارح نقل حالة تانية للمستشفى بنفس المرض.. وعشان كده أول توصية كانت عدم اصطياد وتناول الحيوانات البرية

ليه بقى؟!

لأن الطاعون الدبلي أو "bubonic plague" مرض حيواني بتسببه بكتيريا اسمها "يرسينيا بيستيس"، بتنقلها الفئران والبراغيث، وخصوصا حيوان اسمه #المرموط، اسمه كده، وممكن يموت ثلثين المصابين بيه لو ما اتعالجوش يعني نسبة وفيات بتعدي 70%.. وعايزك عزيزي القارئ المتفائل تنسى خالص #فيروس_كورونا أبو كف رقيق وصغير اللي كبيره يقتل 10% من مصابينه 

#ياساتر_يارب_احفظنا

وخلي بالك إن #الطاعون ده مرض قديم مش جديد، وسبق وقتل الملايين فـ آسيا وأفريقيا وأوروبا، وسموه #الموت_الأسود، بسبب ظهور بقع من الدم لونها بيبقى أسود تحت جلد المصاب

العدوى بتيجي للإنسان من عضة البراغيث والفئران، عشان كده هنرجع تاني لقصة النظافة العامة عشان الوقاية من الإصابة.. مش بس كده.. لازم كمان التحكم فـ تكاثر الفئران وانتشارها.. لأن الفئران دي هي اللي ممكن تنقل المرض من دولة للتانية عادي جدا زي ما حصل قبل كده، لما بتستخبى فـ وسائل النقل وتروح هنا وهناك براحتها

خلصت البوست؟ لأ لسه خد هنا رايح فين

في 3 أنواع من المرض ده:

الأول اسمه "طاعون دبلي"، منتشر لكن انتقاله بين إنسان والتاني نادر شوية، يعني الإصابة تجيلك مباشرة من عضة برغوت أو فار، وده بيسبب التهاب اللوزتين والغدد اللمفاوية، والغدد دي موجودة فـ جسمك كله تقريبا.. وكمان التهاب الطحال.. وأعراضه حمى وصداع ورعشة

التاني "طاعون دموي" وده الجراثيم بتتكاثر فـ الدم وتسبب حمى ورعشة ونزف تحت الجلد أو فـ أماكن تانية فـ جسم المصاب

التالت اسمه "الطاعون الرئوي" وده الأشد فتكا والأرخم لأن حضانته ما بتعديش 24 ساعة، الجراثيم زي ما اسمه واضح بتجري على الرئتين، وتسبب التهاب رئوي، وهنا وارد تنقل العدوى لأي حد بالكحة أو العطس زي حوار #كورونا 

النوع الأول سهل يتطور للتالت ويبقى رئوي، يعني نادر لكن سهل يبقى منتشر لو اتحول وهي دي المعادلة الصعبة فـ قصة الدبلي.. وبشكل عام علاجهم ممكن بس بشرط اكتشاف الإصابة مبكر

وعشان تفهم #أعراض_الطاعون العامة

حمى مفاجئة.. رعشة.. آلام في الرأس والجسم.. ضعف وقيء وغثيان

وارد يظهر التهاب الغدد الليمفاوية فـ حالة الدبلي.. ووارد أعراض الرئوي تظهر بعد 24 ساعة من العدوى

غير أعراض تنفسية زي ضيق النفس والسعال، وبلغم ملوث بالدم فـ كتير من الأوقات

أحمي نفسي ازاي؟

تجنب الاقتراب من أي حد عنده كحّة وخلي المسافة بينك وبينه 2 متر (كورونا ستايل)

تقلل الوقت اللي بتقضيه فـ الأماكن الزحمة (كورونا ستايل)

الامتناع عن ملامسة الحيوانات الميتة (كورونا ستايل)

ونسيت أقولك إن الميت بالطاعون جسمه بينقل العدوى عادي جدا، مصدرها البكتيريا اللي بتفضل موجودة فـ سوائل الجسم

ربنا يحفظنا كلنا

شارك المقال